Dr Schnüry Fritzli und d'Sammel-Hanse

Im Landpfruendhuus sin au immer wider Original deheim gsi. Sone Original isch au der Müry Fritzli gsi. Er het immer mit sich sälber gschwätzt und me hett em wäge däm nur der Schnüry Fritzli gseit. Emool hän mir - my Brueder und ich - müesse uf eusem Rhabarbere-Acher go Rhabarbere hole. Mr sin mit em Märtwägeli dur dr Bäumliwäg gege der Steigruebewäg gloffe. Uf em Acher vom Pfruendhuus, dort wo hüt d Alterssidlig stoht, het dr Müry Fritzli Gmües bäckt. Wo mr anem verby gsi sin, hän mer en afo fuxe und «Müry Fritzli, Schnüry Fritzli, Müry Fritzli, Schnüry Fritzli» gruefe. Dä het si Haue lo gheie und isch uf eus los gange. Mir sin mit eusem Wägeli dr Steigruebewäg ufgrennt. Euse Rhabarberacher isch vom Steigruebewäg an Humberchwäg ufe gange. Mir sin bim Acher verbii und bi der Ziegelhütte dure im Humberchwäg und vo dort uf euse Acher. Mr hei gwartet, bis der Müry Fritzli am Acher verby gsi isch, witer der Steigruebewäg duruuf. D' Muetter, wo scho vorhär het agfange Rhabarberstängel abrisse, het is gmahnt, ändlich mit der Arbet azfange. Mr hei müesse d Bletter vo de Stängel abhaue und si schön in e grosse ovale Chorb biige. Do chunnt uf eimool der Müry Fritzli wider dr Wäg durab. Er het is natürli vergäbes gsuecht gha und het wider an sy Arbet welle. Bevor mr Zyt gha hei, eus z'verstecke, isch er uf is los gange. Er het si grosses Mässer in der Hand gha und het ei ums ander Mool gseit: «Y stich ech uf em Platz zämme. » Eusi Muetter het Müeh gha, dr Fritzli z'beschwichtige. Mr hän em müesse verspräche, ihn nümme uuszmache, und ändlig isch är durab wider an sy Wärch.

D'Sammel-Hanse sind zwee Brüeder gsi. Es isch ene numme wohl gsi, wenn si binenander gsi sin, si sin unzertrennlich gsi. Si hei vom Taglöhnere gläbt und sin au zytewis im Pfruendhus gsi. Emool im Herbscht het ene my Vatter gseit, si solle go d'Rhabarbere spatte, dä Platz am Steigruebewäg, wo vorhär drvo d Reed gsi isch. Wo si fertig gsi sin, si si gly cho der Lohn hole. Und will 's RhabarbereSpatte het miesse süüferli gmacht wärde - d'Rhabarbere hei grossi weichi Wurzlestöck, wo me nit sott verletze und will dä Acher im obere Teil no zimli steil gsi isch, hei si gseit, si heige müesse «hin und wieder» spatte - hän si no e chli meh verlangt als der gwönlich Taglohn. Im andere Frühlig hän die Rhabarbere eifach nit welle wachse. Vo de Nochbere hei mer denn vernoh, dass d'Sammel-Hanse bim Spatte die halbe Stock abgstoche und in Seck furttreit hei. Do hämmer gwüsst, worum die Stock säll Johr nit hän welle wachse. Die Brüeder hän natürli alles ewägg glooge. Me hett ene au nüt chönne näh, die baar Plutzger, wo si für die Rhabarbere übercho hei, sin scho lang in Schnaps umgsetzt und d'Gurgele durab gsi. Aber uusebrocht hämmer doch, wäm d'Sammel-Hanse eusi Rhabarbere verchauft hei.